Monthly Archives: February 2024
ਬੰਦਾ
ਈਵਾ ਪੱਸਲੀ ਆਦਮ ਦੀ ਜਾਂ ਆਦਮ ਦਾ ਹੀ ਬੀਅ ਹੁੰਦੀ ਹੈ।
ਬੰਦੇ ਅੰਦਰ ਸਿਰਫ ਬੰਦਾ ਨਹੀਂ, ਬੰਦੇ ਅੰਦਰ ਧੀ ਹੁੰਦੀ ਹੈ।
ਜਣੇ ਖਣੇ ਦੀ ਤੋਹਮਤ ਕਵਿਤਾ, ਸਾਰਾ ਟੱਬਰ ਸਿਰ ਤੇ ਢੋਹਣਾ।
ਆਪਣਾ ਆਪ ਲੁਟਾਕੇ ਹੱਸਣਾ, ਸੌਖਾ ਵੀ ਨਹੀਂ ਬੰਦਾ ਹੋਣਾ।
ਲਿਖੀਆਂ ਉੱਤੇ ਜ਼ੋਰ ਨਹੀਂ ਹੁੰਦਾ, ਹਰ ਥਾਂ ਹਰ ਕੋਈ ਚੋਰ ਨਹੀਂ ਹੁੰਦਾ।
ਸਾਡੇ ਅੰਦਰ ਕੀ ਨਹੀਂ ਟੁੱਟਦਾ? ਟੁੱਟਦਾ ਹੈ ਪਰ ਸ਼ੋਰ ਨਹੀਂ ਹੁੰਦਾ।
ਮਾਵਾਂ ਜਿਹੀ ਭਰਜਾਈ ਮੇਰੀ, ਪੁੱਤਾਂ ਜਿਹੇ ਦਿਓਰ ਤੋਂ ਟੁੱਟ ਗਈ।
ਭਾਈ ਮੁੱਕਿਆ ਰੰਡ ਨਹੀਂ ਕੱਟਿਆ, ਦੁੱਧੋਂ ਲਾਹ ਨਿਆਣੇ ਸੁੱਟ ਗਈ।
ਮੈਂ ਵੀ ਪਿਓ ਕੁੰਵਾਰਾ ਬਣਿਆਂ, ਸੁੱਟੇ ਫੁੱਲ ਨੂੰ ਸੀਨੇ ਲਾਇਆ।
ਭਰ ਜੋਬਨ ਨੇਂ ਗਲ਼ਿਆ ਜੋਬਨ, ਬੇਨਾਮਾ ਜਿਹਾ ਰੰਡ ਹੰਢਾਇਆ।
ਮੈਂ ਰੋਟੀ ਨਾਲ ਕੰਮ ਤੇ ਜਾਨਾਂ, ਤੱਤੀਆਂ ਬੰਨਦਾ ਠੰਡੀਆਂ ਖਾਨਾਂ।
ਸਭਨਾਂ ਦੀ ਟਕਸਾਲ ਸਮਝ ਲੈ, ਆਪਣੇ ਲਈ ਨਾਂ ਜੋੜਿਆ ਆਨਾ।
ਜਿਉੰਕਰ ਜਿਊਂਦੀ ਜਾਨ ਨਹੀਂ ਆਂ, ਬੰਦਾ ਹਾਂ ਸ਼ੈਤਾਨ ਨਹੀਂ ਆਂ।
ਮੇਰਾ ਮੋਢਾ ਤੋਪ ਮੇਰੇ ਵੱਲ, ਮੁਆਫੀ ਮੈਂ ਭਗਵਾਨ ਨਹੀਂ ਆਂ।
ਅਧੂਰੀ ਕਵਿਤਾ 
